My journey from GP in Egypt, till a Psychiatric resident at University in USA

الجزء الاول طريق ال USMLE:

طبعا يا شباب اللى معاه ال USMLE فطبعا ميصدعش نفسه بالجزء الاول وينط لى اللى بعده, ثانيا ان معظم الكلام ده مش اختراع وغالبيته متكرر بس انا حزود رتوش بسيطع ممكن تزود مجموعك ولو شويه بسيطه لان الكلام بتاع فوق ال ٨٥ او حتى ال ٩٠ فى الجزءين بقا صعب يجيبلك انترفيو فى عياده الحكمه اللى فى حوارى شيكاجو . وخصوصا بعد انتشار دروس Kaplan الخصوصيه (انا مش عارف الدكاتره بتجيب الفلوس دى منين تدفع ٥ الاف دولار مقابل كورس كابلن فى المعادله) طيب اسمع ولو الكلام معاد تحملنى انا بردو اخوك الكبير وبقالى كتير مش متابع على النت . المواقع الهنديه بتجيبلك المعادله لحد الباب المهم ..اسمع يا سيدى المحترم:

١-الترتيب: الجزء الاول تاخده الاول .. فى ابسط من كده ... ده حتى ال USMLE PART1 والثانى اسمه PART2 يبقى اكيد معناه يا اولاد ان فيه جزء اول وبعدين جزء ثانى .. مش عارف الحقيقه البسيطه دى ..لكن غالبيه الشباب ومعظمنا بعد التخرج بيبدأ بالجزء الثانى ال كلينكال عشان (قال يعنى عشان تكون معلومات الكلبنكال لسه فرش فى راسى كانها كيلو سمك لسه طازه) مع ان
الجزء الاول الامتحان كله حالات مع انه امتحان basic science بس طبعا الاسئله بتاعت الحالات مباشره شويه.. بس سيادتك اتخدعت فى كلمه الجزء الاول الbasic science ...زى عندنا فى الكليه اول ثلاث سنين بنخلصهم من غير منعرف تطبق الكلام اللى درسته.. ولو جالك عيان وانت فى سنه ثانيه مثلا تقولوه فوت عليا بعد اربع سنين اكون درست حالتك فى الكلينكل!! مع انك لو طبقت الكلام بتاع اول ٣ سنين حتوصل الى تشخيص وممكن علاج (وهو ده المطلوب فى الجزء الاول تشخيص غالبا) ولو حتى جالك مثلا حاله واحد غيبوبه سكر DKA ودى مشهوره فى الجزء الاول(مع انها كلينكال يا سبحان الله) وانت عارف ان acidosis =Increase H والعلاقه دائما بين الهيدروجين وال البتاسيوم زى بعض . يزيدو مع بعض ويقلو مع بعض(طبعا فيه exeption) وده كلام basic science فلو جابلك رسم قلب وجابلك sine wave ده عشان الزياده الكبيره فى البوتاسيوم وتاثير دى على العيان وهاكذا فيه امثله للصبح تبقى عمال تحل فى كلينكال والامتحان اسمه Part 1
ثانيا ٤٠ % من الاسئله بيتكرر باسلوب غير مباشر فى الجزء الثانى اللى احنا اتفقنا ان الجزئين كلينكال ...مش حييجى يقلك فى الجزء الاول اكمل المعادله الناقصه والكلام ده فالمحصله ان حتكون مستعد اكتر فى الجزء الثانى بمعلومات بنيتها من امتحان الجزء الاول
ثالثا ان درجات الجزء الثانى اهم فى الماتش ولما البروجرام يبص على الدرجات بيهتم بالجزء الثانى اكتر فانت ما تخاطرش فى الجزء الثانى قبل الاول وتشوف نفسك متعود على اسلوب امتحان ال USMLEقبل ما تخش معمعه امتحان Step2CK
دى امثله مش ١٠٠% مظبوطه فيه شواز لكل قاعده . يظل ان فيه ناس مسترييحه تخش الثانى قبل الاولانى ويظل ان فيه اسئله قليله مباشره فى الجزء الاول وهكذا بس انا بقول القاعده العامه

٢- المصادر: اضف الى مكتبتك هذا الكتاب الجديد!! (الكلام ده معروف من ٩٩% منكم بس الاعاده افاده):
الجزء الاول: زى الشاطر تنزل كل الDVDبتاع كابلن وتشوفها او تسمعها مع ال كتب بتاعتها Kaplan Lecture Notes + فى الباثولوجى انسى كابلن وزاكر من dr. Gjolian محاضراته صوت مهمه جدا جدا والكتاب الباثولوجى بتاعه حتى موجود PDF على النت ومهم جدا متهملش بردو ال Slid بتاعت دكتور جوليان + الباكتيريا Microbilogy made Redeculsly Simple
٣- المزاكره:
حضرت العده دى ...حاول تشوف كل يوم ساعه او ٢ مش اكتر وعشان تستغل الوقت وانت مسافر او راكب مواصلات اسمع جوليان صوت ووكمان او MP3 الموضوع حياخد منك مزاكره اولى ٤ الى ٥ شهور عشان تحفطهم( مش كتير زى ما انت فاهم لان الدرجه حتفرق) وبعدين تجيب ال FIRST AID مهم جدا جدا تزاكر منه بعد ما تخلص كابلن مش قبله
بعد ٦ شهور متوسط المجهود ده كله ملهوش قيمه من غير ما تعمل حاجتين مهمين:
تشترك فى ال USMLE WORLD ده MUST مش اختيار ولا تقولى انا اصحابى سرقو الاسئله والحاجات دى ... الكلام ده لازم ينتهى باشتراك لمده شهر بى ٨٠ دولار هما اهم من اشتراك الامتحان نفسه وتعمل الشهر كله بلوكات بوقت محسوب زى الامتحان الاصلى بعد كل بلوك تكتب المعلومات الجديده اللى صعب اصلا تلاقيها فى كابلن واضحه وانت مش عارف اذا كانت مهمه ولا لا!! واللى انت لازم تعرفه ان ١٠% من اسئله UW لقيتها فى الامتحان بتاعى والباقى شبه الاسلوب بتاع ال UW . كام معلومه من اسئله غلط:
IgA Released from B cell ander effect of TGF-b mainly and then IL5
HTN patient on Thiazide duiretic+ LOW Na diet ---> المحصله ان بيزيد Renal Na reapsorption ويقل ال صوديوم فى البول!!! عشان بيزيد تحفيز الaldesteron
Etarecept(Tum. Necrosis Factor inhibitor, ttt of autoimmune like RA) MUST do screen for TB, PDD skin test, before use
وهكذا دواليك امثله لا حصر لها وتكتب وفى اخر الكورس حيكون عندك مزكرات قيمه فيها الخلاصه
الحاجه الثانيه اللى لازم تعملها لازم جدا جدا تعمل امتحان تجربه فى موقع المعادله الرسمى NBMEوتاخد الامتحان ال٤ او ٥ وتدفع ٤٠ دولار الكلام ده قبل معاد امتحانك بى اسبوع الى اسبوعين وبعد ما تخلص USMLE World ده بردو مش اختيار ده اجبار لان انت الدرجه اللى حتجيبها فى الامتحان ده هى حتكون تقريبا الدرجه اللى حا تجيبها ى الامتحان الحقيقى ولو جبت اقل من ٩٠ متخشش عشان انت مش لازم تضيع مستقبلك فى سبيل تجربه. اما لو انت حاسس انك احسن او ما كنتش مستعد خد امتحان تجريبى تانى من الخمسه اللى على الموقع وتشوف حتجيب كام المره دى !! المهم متخشش من غير فكره مسبقه عن الدرجه التقريبيه اللى حتجيبها فى الامتحان

ألامتحان نفسه:
سيبك من الكام اللى انت اكيد عارفه بتاع الوقت مش كفايه ولازم تستريح كويس واتنام وتجيب معاك موز وشكلاته .. اكيد انت عارفه.. لكن اللى انت مش عارفه الحاجات دى:
اسئله المعاده غبيه جدا ومتوقعه لانها لازم تكون متفصله بالمقاش مش زى الواقع اللى ممكن اى شخص معنده اى مرض فى الكتاب مش لازم يكون بالظبط.. عشان كده
اولا واهم حاجه تبدأ السؤال تقرا اول جمله تعرف العيان راجل ولا ست كام سنه ازا كان اسود ولا اروبى ولا طفل وبعدين تسيب الكلام اللى فى النص وتنط على اخر سطر مكتوب ايه بالظبط ... عاوز تشخيص ولا تحليل ولا احسن خطوه تتعمل وبعدين تنزل بعينك على الاختيارات .. ممكن تجاب ٤٠% من الاسئله كده من غير ما تقرا السؤال نفسه واسمع مثلا
راجل ٥٠ ولا ٦٠ سنه بيدخن بقاله فتره طويله ده Cancer Lungحتى لو حاله جلديه وحيقولك عنده مشكله فى البول كتير tumour secretes hormone like factors
طقل قوقازين دى حاله Cystic Fibrosis طفل اسود دى حاله Sickle Cell Anemiaوغلبا تكون حاله حرجه ... الخ معرفتش تبقى تقرى الحاله
الامتحان مفيش مشكله لو جاوبت صح بس المهم انك تجاوب متسبش سؤال . غالبا لما كنت فى الامتحان ومعدش على البلوك غير ٥ دقايق وانا ادامى ٦ اسئله يعنى لو فكرت ححل ٣ ومش حشوف ٣ اسئله وطبعا احتمال ان ال ٣ اللى حلتهم مش صح ! الحل انى كنت من غير ما اقرا السؤال اختار اى حاجه واجيب السؤال اللى بعده ,الى ان اخلص ال ٦ او ٧ اسئله الباقيينى وبكده اضمن لو حتى الوقت خلص من غير ما اشوف السؤال الاخير او اللى قبله ففيه فرصه ٢٠% ان اجابتى صح بدل فرصه ٠% .. وطبعا وانا بقلب بسرعه فى الاسئله عشان اختار اى حاجه لما بشوف سؤل سطرين اقراه بسرعه واحله يبقى بكده بعلى من فرصتى فى ان الاجابه العشوائيه تكون اقرب الى الصحه . لان غالبا ولاد اللقيمه بيحطو اسئله طويله فى النهايه وانت فى عرض دقيقه ..
طبعا اى صوره او تحليل بص عليها الاول وبعدين بص على الاختيارات بسرعه يعنى سؤال انا فاكره جايب صوره عين وانا متهيألى ان العين كانت زرقا روحت بصيت على الاختيارات وجدت اسم مرض Osteogenesis Imperfecta من غير ما افكر او اقرا السؤال مين وفين وازاى رحت اخترت الاجابه دى واللى بعده
الامتحان مفيش فيه ٣ اسئله هستولوجى على بعض ويليه التشريح والمناعه فى الكميه لكن مليان بيوكمسترى يليه فسيولوجى وفارما( انا مش عاوز احط الباثولوجى منفصل لانه موجود فى كل حاجه وجزء من كل سؤال)
غالبا لو عملت معظم الحاجات دى مع اضافات شخصيه طبعا حتجيب فوق ال ٩٠ ان شاء الله فى الجزء الاول ولو انا افتكرت حاجه حضيفها فى ال USMLE PART 2
فاصل قصير (حوالى ٨ ساعات انام) ونعود مع الجزء الثانى من المعادله الامريكيه
حتى نلتقى لكم منى ارق الامانى والدعاء ان شاء الله بالتوفيق الى كل طالب علم