السلام عليكم ورحمة الله
بسم الله الرحمن الرحيم,,,,,,
حبيت أكتب تجربتي مع السفارة الامريكية في التقديم على الفيزا قبل ما انسى, طبعا هشرح بالتفصيل الممل علشان اللي مرحش قبل كده أكيد هيلاقي معلومات مهمة ومريحة ليه بحيث انه يبقى عارف الخطوات اللي هيمر بيها لحد لما يوصل للخطوة الأخيرة في هذى اليوم وهوه المقابلة مع القنصل.
بدأت يومي بعد صلاة الفجر رجعت البيت لبست الهدوم اللي هروح بيها السفارة, خد بالك مش لازم تلبس بدلة, أقصد ان لبسك للبدلة مش هيزود احتماليات حصولك على الفيزا, انا شفت ناس لابسين بدلة أخدو ريجيكت سريع سريع وناس تانية لابسه عادي وورقها خلص وحصلو على الفيزا بفضل الله.
طبعا معلومة جانبية كده للي ميعرفش عنوان السفارة: شوف يا سيدي انت دلوأتي واقف في ميدان التحرير شايف الجامعة الامريكية؟ امشي في الشارع اللي بين مجمع التحريرو الجامعة الامريكية افضل ماشي في الشارع" مش كتير متقلقش" لحد لما هتلاقي على اليمين بنزينة التعاون وجنبها برج مكتوب عليه التعاون بردو, خد الشارع اللي جنب البنزينة وافضل ماشي معاه هتوصل للسفارة ان شاء الله.
هتوصل السفارة طبعا يستحسن توصل بدري انا عن نفسي وصلت الساعة 8 الا عشرة معادي كان الساعة 8
انا دايما كده بوصل متأخر!!! متأخر؟ ده انا واصل قبل المعاد ب 10 دقايق!؟ هقولك يا سيدي عارف اللي واصل قبل المعاد ب 10 دقايق ده؟ كان رقمة في الاربعينات يعني كان عليه انه يستنى حاجه واربعين واحد يخلصو اجراءاتهم لحد لما يجي دوره. يعني الخلاصة تكون قدام السفارة الساعة 7 أحسن حاجه.
هتوصل السفارة هتلاقي قدامها طابور وفي واحد واقف بيسألك عن اسمك ويشوف اسمك في الاسماء اللي حاجزة المعاد النهاردة وبعد ما يلاقيههيسألك عن وصل الCIB بتاع دفع فلوس الفيزا و هيشيك على الابليكيشنز اللي معاك اللي هما (DS-156 , 157 & 158) لو لقاهم مطبوعين كويس هيقولك الصور لو سمحت؟ هما عايزين صورة واحدة. على فكرة ساعة لما وريتله صورتي لقيته بيقولي ايه الصورة دي شكلها قديمة فا رديت علية بعفوية سريعة جدا وقلتله " دي لسة طازة" مبقلهاش كام يوم طالعة قام قايلي طيب اوكي تقدر تتفضل وقام معلم على وصل ال CIB. انت دلوأتي دخلت من باب السفارة الأمريكية. هتدخل غرفة كده ياخدو منك الموبايل ويدوك ورقة برقم علشان لما تخلص ترجع تاخده وبعدين تعدي من جهاز كده بيكشف لو في أي حاجه معدنية معاك. كان معاية اتنين جنية فضة من الجديد ده
شلتهم حطيتهم على جنب وكله بقى تمام بعدها.عديناالغرفة دي بقى بتمشي في طرقة كده وبعدين بتنزل سلم وتاخد يمينك هتلاقي باب تدخل هتلاقي فرق ال DHL اللي جوه السفارة. تاخد شمالك هتلاقي باب تاني تدخله. انت كده وصلت للمقر الاخير اللي مش هتخرج منه غير على برة السفارة على طول. أول ما هتدخل هتلاقي اتنين واقفين بياخدو منك الورق اللي هما عايزينه ( اللي هوه ايصال الدفع و السيفيس و الابليكيشنز اللي فوق و ال DS-2019 ) دي الاوراق المطلوبة لفيزا الطالب (J1 ) طبعا بتختلف في أنواع الفيزا التانية. دبس أوراق في الجواز و الاوراق اللي أخدها حطها جوه الباسبور. واداهولي وقالي اتفضل اقعد انتظر رقمك يتنده عليه. قعدت يا دوب 10 دقايق واتنده علية.
نصيحة جانبية لوجه الله: انشغل في وقت الانتظار في الاستغفار صدقني والله ذكر ربنا في وقت زي ده بيديك ثقة في النفس عجيبة طبعا انتو حافظين قول الله عز وجل على لسان نوح " فقلت استغفروا ربكم انه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا" و خدو الذكر العجيب ده اللي سبحان الله ما ذكرت الله به قبل أي حاجه الا وكان التيسير من نصيبي بفضل الله ومنه " حسبي الله لا إله الا هو عليه توكلت وهو رب العرش العظيم" دول بس كلمتين كده بالنسبة للانتظار من أخ محب ليكم.
معلومة هامة: انت هتقابل تلات موظفين أمريكان بعد ما تدخل قاعة الانتظار. المهم انا استنيت 10 دقايق واتنده على رقمي لأول موظف كان شباك رقم 6. الموظف ده يا دوب وظيفته ياخد منك الورق اللي طلبه منك الموظف اللي على الباب والباسبور فقط. الموظفة مفحتش بؤها معاية يا دوب شاورتلي هات الورق أخدته ورتبته تاني وحطته على جنب وشاورتلي بمعنى تقدر تتفضل. رجعت قاعة الانتظار علشان استنى دوري في الموظف التاني.
استنيت حوالي ساعة ونص لحد ما اتنده عليه. الموظف التاني وظيفته انه ياخد بصماتك بس ما تقلقش مفيش حبر وكلام من ده
ده حاجه كده الكترونية. ده كان على شباك رقم 8 بتروح تقف قدام الشباك الموظفة تتأكد انك انت اللي في الصورة وبعدين تديك الاوامر اللي تعملها علشان تاخد بصماتك. عملية سهله وبسيطة خالص. بتقولك صوابع ايدك الشمال الاربعة وبعدين اليمين وبعدين الابهامين. مع انها عملية سهله الا اني شفت ناس فضلو يعيدوا فيها كزا مرة وطولو مش عارف ليه. بعد ما بتاخد بصماتك بترجع تاني الى قاعة الانتظار علشان تستنى اللحظة الحاسمة ألا وهي مقابلة القنصل.
انا استنين حوالي ربع ساعة ولقيت دوري جه. طبعا وانت رايح استغفر وقول الذكر الجميل "حسبي الله ...." هتدخل عليه وانت مبستم كده وهيدور بينكم حوار كان معاية كالآتي, هتضطر أكتبه بالانجلش علشان الدقة مش أكتر.
Me: Hi.
Consul: Hello, you must be …..(My name)
Me: yes I'm.
Consul: Why are you going to the U.S?
Me: for a clinical rotation at University of….(name of university)
Consul: Where did you find this university?
Me: at ………
Consul: who is going to pay for your trip?
Me: My father.
Consul: What do your father do?
Me: …………….
Consul: Can I have a letter sent to you by the university?
Me: yes, that's it.
Consul: Are you going to come back to Egypt after finishing?
Me: off course I'm still a student.
Consul: can you say your name for me please?
Me: ………(My name)
Consul: your visa is ok but we wil need two weeks to issue it. Take this paper and the website to chick your status after 2 weeks and you will find "clear" that means to send your passport and this paper to the embassy by DHL. Thank you & bye bye.
Me: Thanks.
ده كل اللي حصل معاية في السفارة الامريكية وخرجت من السفارة حوالي الساعة 10 بالزبط. حاولت أبقى دقيق على أد ما اقدر وحاولت أقول كل المعلومات اللي عرفتها في المشوار ده علشان الكل يستفيد وطبعا أخيرا انا ليه طلب صغير خالص منكو وهوه انكو تدعولي بالتوفيق والسداد في الدنيا والآخرة, و آسف على الإطالة.
One week later exactly I found on the website that my visa is approved and I need to send my passport to them through the DHL.
Another week and I received my Passport with the visa on it.
Good luck for everybody,, and may Allah make the good easy.
